آخر امتحان .. ختامها مش مسك!!

السلام عليكم ..

طبعا أمس أنا رادة من الإمتحان تعبانة حدي .. فما ذاكرت على طول .. ريحت شوي وقمت أذاكر بالليل بما أني وصلت متأخر البيت ..

المهم .. المادة statistic .. وطبعا اللي يعرفها يعرف شناعتها!! ما بتحرطم وايد لأني قصرت في هالكورس .. ما كنت انتبه وايد ..

وركزت عالبروجكت أكثر .. والكويزات كلها A .. لكن طبعا الامتحان النهائي دايما غير وخصوصا انه المس كانت تساعدنا عالكويزات وكان open book .. فواجهت صعوبات كثير أمس وأنا أحاول أفهم المادة .. طبعا انا الشاطرة كنت مذاكرة في الإجازة لكن المس طرشت ايميل أنه ركزو ع النظري أكثر من الحسابات .. وهالشي صدمني وحسيت انه معنى هالكلام اني كأني ما ذاكرت شي ..

فرديت أراجع من أول ويديد.. وبعدين ما أنكر إني لعبت .. واليوم الصبح في الكلية قعدت ويا ربيعتي نذاكر وأسألها وتسألني .. إلى أن تعبنا وحسينا الوقت ما يمر وقمنا نلعب عاللاب.. << هي بدت وشجعتني :p

قامت الأخت وطرشتلي هالصورة .. عشان تشجعني يعني .. :s ..

حليله بعد محاولات يائسة انتحر عالجذر ..

رحت ودخلت القاعة وكنت مخططة مع ربيعتي انه هي تدخل قبلي وتقعد وبعدين أنا بدخل وبقعد عندها والسبب إنه في مس شنيعة تستهدف البنات اللي يعرفون بعض وتفرقهم رغم انه اساسا ما في مجال للغش ونحن مش من النوع اللي يغش لكن هيه مع كل حد جيه فأنا قلت لها لا تكلميني عشان لا تحس وتنتبه .. وهذا قبل أن تتوزع الأوراق يعني عادي الكلام من الاساس..

والمس طبعا مشغولة تفرق البنات ومرت حذالنا وما انتبهت عادي .. لكن لأنه جدام ربيعتي في طاولتين فاضيات فقالت لها قومي يلسي جدام .. فضحكت وطالعتها وهي قامت وهي تتحرطم ولما المس حست شلتها وودتها بعيد عني .. رغم انها غيرت مكانها على كل حال فليش تردين تبعدينها أكثر عن جي .. حليلها ربيعتي ..

استلمنا الأوراق وبدأت الحرب.. وتعالي عاد يا 1672008 حلي المسائل .. حسيت مخي قفل .. والمعلومات البسيطة جدا اللي عندي تلخبطت .. وحاولت أخمن ..

وبعد الاجتهاد وصلت الصفحة الأخيرة في نص ساعة فقط! (مع العلم الامتحان ساعتين).. انجاز ..

وبعدين الوقت مر وأنا انتقل من بستان إلى آخر أحاول أستفيد من المعطيات وأألف قانون وأحل ..

لين ما تقريبا حليت كل الأسئلة ومش متأكدة إلا من صفحة يمكن ومش كل الأسئلة بعد وفي سؤال عليه 8 درجات متأكدة منه فقط لا غير الباقي إبداع حتى الخوارزمي ما وصل له ..

رغم إني أحب الرياضيات (الجبر والهندسة) لكن سبحان الله الإحصاء ما يدخل مخي وانا مشكلتي في الحياة اذا شي ما حبيته ما بتعب عمري فيه .. وحتى لو بذلت مجهود قبل الامتحان لكن لأني أكون مقصرة غالبا في البداية.. (أيام الدراسة يعني) فيأثر علي ..

هالأزمة عندي اياها حتى من أيام المدرسة .. وبعد الجهود المبذولة أيام الامتحانات ومهما كانت أكثر تزفيته بييب في ال 60 .. لكن شكلي ضربت الرقم القياسي هالمرة..!

والحين اللي يشوف درجاتي في Account ,English , Macroبينصدم من الإحصاء وال Ethics .. لأنه هالمادتين أكرهمم بكل ما تعنيه الكلمة من معنى .. :p ..

لكن إن شاء الله وبعونه رغم توقعي لرسوب مع مرتبة الشرف في هالامتحان لكن ال overall درجاتي رح تنجحني لأن عندي امتياز في كوزين وبروجكت .. فإن شاء الله ع خير ..

وهاي أحداث آخر امتحان.. رغم اني زفت لكن أحس انه اليوم ممتع .. يمكن لأنه آخر يوم .. مستانسة حدي .. << غريبة صح !