ذكرياتنا مع دامو .. :) ..

السلام عليكم

لما كتبت عن السير دام في تدوينة سابقة قلت اني رح انزل عنه تقرير ..

والتقرير هو هذا ( ذكرياتنا مع دامو) ..

اسمه: Dr. Damodharan

طويل وايد ماشاء الله يوصل 190 أو أكثر ..

هالإنسان فيه طبع غريب وهو انه ما يتحمل يقعد في الكلاس أكثرعن ساعة .. نحن كلاساتنا ساعتين وهو يوصل الكلاس متأخر بربع ساعة وينتظر البنات لين ما يكتملون يعني هاي ربع ساعة زيادة وجيه تروح النص ساعة الأولى .. وبعدين يشرح جزء من الدرس وبريك 5 دقايق ويرد يشرح جزء وبريك لين ما تقريبين يكمل نص ساعة ثانية .. ويطلع من الكلاس.. ونحن جيه نحصل ساعة كاملة بريك من كلاسه .. وطبعا مع العلم انه شرحه سرييييع جدا .. يعني الحق ما تلحق ما نعرف نحل المسألة ولا ننتبه وياه .. ولا نشوف الشرح ونشوف الورقة .. والبنات يقولون له سير عيد ما فهمنا ويعيد حليله ما يقصر لكن بنفس السرعة ويمكن أكثر بشوي!!

انا حليلي يوم الأخ يطلع من الكلاس أكون يالسة بعدني أحاول أستوعب اللي قاله وأقعد أتأمل في الورقة اللي عندي وأقارنها باللي هو كتبه ع اللوح لين ما أستوعب ..

في كلاس هالمخلوق انا وربيعتي يا نضحك ما ادري من القهر ولا من اسلوبه ولا لأنه نحس عمرنا ضايعين المهم نحن طول الكلاس نتحرطم ونضحك .. وأحيانا تصيبنا حالة اكتئاب اذا ما قدرنا نستوعب ..

وطبعا أنا إنسانة أعبر عن مشاعري دائما على الأوراق والكتب :) .. طبع فيني ..

baka =غبي*

باكا كلمة يابانية معناها غبي*...

مرة من المرات الاخ دام حضر الكلاس كعادته ينتظر البنات .. وبعدين شرح وخلص وبغا يطلع وكان عنا امتحان midterm .. قريب ..

فلما بغى يطلع (بعد ما شرح ساعة بس او أقل ) وحدة من البنات قالتله انه يكمل ويانا المسائل عشان الإمتحان وانه بعد في وقت .. جان الأخ فجأة عصب وأونه انتو ما رح تستوعبون ..قلناله انه نحن عادي عنا ونبا لكن هو ما ادري شفيه ما عيبه وطلع من الكلاس واونه بطرش الاجوبه عالميل.. وفعلا طرش لكن مش كل الأجوبة وفي الإمتحان زفتنا لأنه الأخ ما كان حال ويانا كل شي والمحاسبة يباله شرح مجرد أجوبه نحن شعرفنا كيف حلها .. دعينا علي هاك اليوم من الخاطر !!

وأخيرا.. آخر كلاس .. الإستاذ كان شكله مستعيل وإلا يخلص الدرسين اليوم رغم انه عنا كلاس ثاني بعدين لكن الأخ مصر ..

وطبعا يشرح صارووووخ أسرع من كل مرة .. ونحن من ورقة لورقة وبسرعة ومش ملحقين وتونا بنحاول نطبق اللي قاله الا الأخ انتقل للنقطة اللي بعدها ويالله يركض ما ادري وين يتحرى عمره ماراثون هذا ولا كلاس ما اعرف !! وطبعا لو وحدة قالته انها ما فهمت نحن نستانس مش لأنه بيرد بيشرح بس لأنه بيصير عنه كم ثانية نلحق نكتب شي عشان نفهم..

كنا بإختصار في سباق مع الزمن!!.. من خاااطر ..

وطبعا بعد كل هالحفلة اللي سواها الأخ دامو ولأول مرة حطم الرقم القياسي لما كمل ساعة كاملة + نص.. شرح :).. بدون بريكات ساعة كاملة ونص!!

وفي النهاية الأخ طلع من الكلاس مخلفا ورائه وجوها مصدومة, مندهشة, متوترة, متعبة, غاضبة ,, ... كل الأنواع :)..

أنا كنت الوجه اللي تحت :) رغم انه ربيعتي تقول اني اللي فوق!!