بسم الله ..
أمس أنا وكالعادة من يوم ما رديت من لبنان وأنا الليل ما أنامه .. يا أفكر أو أقرا ..
وأمس قررت أنام لأنه لازم أقوم اليوم الصبح بكير وأوصل اختي الجامعة ..اختي تسوق لكن ماماتي تبا السيارة اليوم وأنا الضحية..
واللي صار انه كالعادة ما قدرت أنام .. أنا عادة لما أقرا في الليل أنعس .. لكن هالايام بالذات كل شي عندي بالعكس .. قريت اندمجت ..
لين الساعة 3 وشي قريب الفجر .. وطبعا هالوقت لازم يوميا تقريبا موبايلي يرن .. والمتصل بنت خالتي من لبنان .. نفس الحالة ما تقدر تنام ونقضيها لين الصبح مس كولات .. تمينا لين 4.. وبعدين أنا ما اعرف كيف غفت عيني .. ونشيت مرة ثانية الساعة 5 واسمع صوت الإمام من المسجد اللي ورا البيت يصلي .. جان أقوم وأصلي .. ورجعت نمت.. والساعة 8 يت اختي تقومني عشان اوصلها .. قمت وانا تعبانة .. والمشكلة انه الدرب طويل ومتعب .. وبصراحة يخوف لأنه وايد طويل وبعيد.. حتى لو الصبح أخاف..
قمت واتوضيت ولبست ونزلت اختي تترياني في السيارة وطبعا هي ساقت لين ما وصلنا الجامعة ..
نزلتها وقعدت مكانها عشان أرد البيت .. وطبعا قبل أن أسوق لازم ألبس سماعات التليفون وأحط الحزام وأعدل القعدة .. ولما خلصت هالإجراءات بديت أسوق واتصلت فحبيبتي خالتي .. اشتقت لها وايد و لما اتضايق لازم أكلمها .. أحبها وايد الله يفرج عنها ويخفف عنها مثل ما خففت عني .. وكلمتها .. واستانست وايد لما سمعت صوتها واليوم بيحضرون حفلة خطوبة بنت خالي في لبنان :( .. يا ليتنا كنا معكم .. وانا في الأوقات اللي هم في الحفلة يمكن أنجبر أزور ناس .. الله يهديهم :( .. بس بحاول ما أروح بحجة إني مش نايمة أمس وتعبانة ..
والله اشتقت للبنان وأهلها .. واشتقت لخالتي .. القعدة وياهم حلوة وما تنمل .. ناس يحبون بصدق .. ونحس بحبهم حتى لو ما اتكلموا.. وناس عايشين معاهم ودايما يقولولنا اشتقنالكم ونحبكم ..وهم بقلبهم يكرهون ويحقدون .. وينافقون .. الله لا يبلي حد بمثلهم ..
شو اللي خلاني أتذكرهم ما أدري كنت مستانسة توني ... المهم اليوم أحسه حلو لأني أولا مرتاحة نفسيا والشكر لربي ثانيا سمعت صوت خالتي الحبيبة وطمنتني وخففت عني وسمعتني.. فديتج يا خالتي ..ثالثا .. ما أعرف بس أحس إني نشيطة رغم اني مش نايمة .. والله يتمم اليوم بخير .. ياااارب ..
كلمة أخيرة .. اممم
الله لا يحرمنا من ألطافه الخفية ورحمته الواسعة .. ويسعد الكل ويفرج عن الكل ويصبر الكل .. يا رب
